Grop Contes e istòrias en lenga nòstra, clicar aquí

Pageina, pèr lou Cascarelet, en escrituro mistralenco

- Digo-ié tu !

- Vaudrié miés que ié diguèsses !

Ansi s'arresounavon Bourlas e sa femo, proufechant de ço que Pageina èro encaro dins soun lié. Aquéu Pageina èro un ami de Bourlas qu'èro arriba un bèu matin en disènt : - « I’avié long-tèms que s’èrian pas vist. Ai pensa te faire plesi en venènt faire uno pichoto visito ». E i’avié quinge jour qu'èro aqui, manjant coumo un rassaire e bevènt coume un trau sènso jamai parla de parti.

Li Bourlas n'avien soun proun, e cercavon un biais de se desfaire d'aquel oste encoumbrant, car èron louja à l'estré e li sòu ié fasien pas la guerro. Es la femo que decidè, fin finalo, de ié parla.

Quand Pageina se fouguè leva e que aguè amata soun boulas de café, la Bourlas ié diguè : - « Brave ami, fara qinge jour vuei qu'avèn lou plesi de vous agué emé nautre. Vosto femo e vòstis enfant devon se langui. A la plaço de dono Pageina atroubariéu que restas trop deforo. Ço que vous dise aqui, n’es pas pèr vous enmanda mai me sèmblo qu'un ome qu'a quita soun oustau despièi quinge jour pòu pas sènso resoun seriouso… »

- « Avès resoun, coupè Pageina, ma femo e mis enfant devon langui de me vèire. Ié vau escriéure de veni ! ».

Pageina, en escritura dicha classica

- Diga-ié tu !

- Vaudriá mielhs que ié diguèsses !

Ansi s'arresonavan Borlas e sa femna, profechant de çò que Pageina èra encara dins son lièch. Aquèu Pageina èra un amic de Borlas qu'èra arribat un bèu matin en disent :

- I’aviá long-temps que s’èriam pas vistes. Ai pensat te faire plesir en venent faire una pichòta visita.

E i’aviá quinze jorns qu'èra aquí, manjant coma un ressaire e bevent come un trauc sensa jamai parlar de partir.

Lei Borlas n'avián son pron, e cercavan un biais de se desfaire d'aquel òste encombrant, car èran lotjats a l'estrech e lei sòus ié fasián pas la guèrra. Es la femna que deciguèt fin finala, de ié parlar.

Quand Pageina se foguèt levat e qu'aguèt amatat son bolàs de cafè, la Borlas ié diguèt :

- Brave amic, farà qinze jorns vuèi qu'avèm lo plesir de vos aguer emé nautres. Vòsta femna e vòsteis enfants devon se languir. A la plaça de Dòna Pageina atrobariái que restatz tròp defòra. Çò que vos dise aquí n’es pas per vos enmandar mai me sembla qu'un òme qu'a quitat son ostau despuèi quinze jorns pòu pas sensa resons seriosas…

- Avètz reson, copèt Pageina, ma femna e meis enfants se devan languir de me veire. Ié vau escriure de venir !

Sansgêne

- Dis-le lui toi !

- Il vaudrait mieux que tu lui dises !

Ainsi s'interpellaient Bourlas et sa femme, profitant de ce que Sans-Gêne était encore dans son lit. Ce Sans-Gêne était un ami de Bourlas qu’était arrivé un beau matin en disant :

- Il y avait longtemps qu'on ne s'était pas vus. J'ai pensé te faire plaisir en venant te faire une petite visite.

Et il y avait 15 jours qu’il était là, mangeant comme un scieur et buvant comme un trou sans jamais parler de partir. Les Bourlas en avaient assez et cherchaient une façon de se défaire de cet hôte encombrant, car ils étaient logés à l'étroit et les sous ne leur faisaient pas la guerre. C'est la femme qui décida enfin de lui parler. Quand Sans-Gêne se fut levé et qu'il eut terminé son bol de café, la Boulas lui dit :

- Brave ami, ça fera 15 jours aujourd'hui que nous avons le plaisir de vous avoir avec nous. Votre femme et vos enfants doivent se languir. À la place de Madame Sans-Gêne je trouverai que vous restez trop dehors. Ce que je vous dis là ce n'est pas pour vous chasser mais il me semble qu'un homme qui a quitté sa maison depuis 15 jours ne peut pas sans raison sérieuse…

- Vous avez raison, coupa Sans-Gêne, ma femme et mes enfants doivent se languir de me voir. Je vais leur écrire de venir.

Per tornar a la pagina Contes Mistral, Romanilha, Lo cascarelet, clicar aquí