Grop Contes e istòrias en lenga nòstra, clicar aquí

La luseta dau paradís, de J.H. Favre

Per i’ aver de tavan, Òsca ! N'i’ a de tota mena : de gròs, de pichòts, de corts, de longs, de prims, de bodenflas, de banaruts, que vòlan, nadan, corron, escalan, tirassan la bedena. E quetei biais espectaclós ! n'i’ a que fan fofònia[1], zi-zi-zi en se fretant lo còu dins lei plecs de sei gravatas[2] ; n'i’ a que, la nuèch, atuban lantèrna en s'embrasant l'emboriga ; n'i a’ que dos per dos, l'un davans, l'autre darrièr, ròtlan una pelòta pastada de bosa. E quetei pintura ! Se n'en tròba de negre, de ros, de color de pega ; se n'en vei qu'an sus l’esquina lo blau de la mar, lo verd dei tepas, lo trelutz de l'aur, lo rog de fuòc dau pairòu escurat. Esbrilhaudan. Lei prendriás per lei bebeis de l'orfèbre. Ah ! Qué son bèus. Fan tresfolir l’enfant de jòia.

Aqueu que lo mai m'agrada es tot-bèu just gròs coma un pese ; enfarinat dessota de podra d'argent, en-dessús d'un blau celestiau, tant linde, tant doç ! Aquò viu sus leis amarinas, lei vèrnas au bòrd deis aigas frejas que cascalhan entre lei rocàs velotats de mossa, au bòrd dei valadons.

Pèd d’aicí, pèd d'ailà sus lei doas ribas e servietas desplegadas au mitan, lei drollons, lei mai afeccionats (e n'en ère) culhissián sus lei brots pendolins lei bestiòtas que se miralhavan. Em’un bot de fièu lei chatonas n’en fasián de capelets que portavan au còu en guisa de cadenetas, e vos afortís que lo colier azurenc èra que non-sai agradiu. Per ieu, pastorilhon d'aquel aver, teniáu mon bestiari lusent dins una boita emé de fulhatges d’amarinas, e de-longa regardave, regardave lo blu de paradís.

Le ver luisant du paradis

Pour y avoir de l’insecte, bravo ! Il y en a de toute sorte : des gros, des petits, des courts, des longs, des minces, des ventrus, des très cornus, qui volent, nagent, courent, escaladent, trimbalent leur bedaine. Et de quelle façon spectaculaire ! il y en a qui font des flonflons, des zi-zi-zi en se frottant le cou dans les plis de leurs grattoirs ; il y en a qui, la nuit, allument une lanterne en s'embrasant le nombril ; il y en a qui deux par deux, l'un devant l'autre derrière roulent une pelote pétrie de bouse. Et quelle peinture ! On en trouve des noirs, des roux, des couleur poix. On en voit qui ont sur le dos le bleu de la mer, le vert du gazon, l’éclat de l'or, le rouge du feu du sombre chaudron. Ils éblouissent. Tu les prendrais pour les joujoux de l'orfèvre. Ah ! Qu’ils sont beaux. Ils font tressaillir l'enfant de joie.

Celui qui me plaît le plus est tout juste gros comme un pois ; enfariné en dessous de poudre d'argent, en dessus d'un bleu céleste, si pur, si doux ! Ça vit sur les pousses d’osier, les aulnes au bord des eaux froides qui gazouillent entre les grands rocs veloutés de mousse, au bord des ruisseaux.

Un pied d'un côté, un pied de l'autre, sur les deux rives et serviettes dépliées au milieu, les enfants, les plus motivés (et j'en étais) cueillaient sur les brins pendillant les bestioles qui s’y réfléchissaient. Avec un bout de fil les filles en faisaient des chapelets qu'elles portaient au cou en guise de chaînette, et vous affirmaient que le collier azuréen était on ne peut plus plaisant. Pour moi, petit berger de ce troupeau, je tenais mon bestiaire luisant dans une boîte avec des feuillages de saules, et sans cesse je regardais, je regardais le bleu de paradis.

[1] Cornemuse, mandoline, flonflons

[2] Gravatar, gratar, gratter. Peut-être cravate ou grattoir.

Per tornar a la pagina contes per totei, mercé de clicar aquí

Per tornar a la pagina autreis autors, mercé de clicar aquí